Etimologiya

Carpus latınca “bilək” deməkdir. 

Sinonimlər: karpal kanal

Başqa dillərdə: canalis carpi (L), carpal tunnel (EN), karpal tünel (TT), канал запястья (RU), der Karpaltunnel(DE)

Anatomiya

Karpal tunel altqoldan ələ doğru fleksor vətərlərinin və orta sinirin keçidini təmin edir. Dorsal divarını bilək sümükləri və bunları səthən bərkidən ligamentum carpi radiatum adlı bağ təşkil edir. Palmar səddi isə retinaculum flexorum-dur. Karpal kanaldan 10 vacib qurum keçir:

·        Musculus flexor digitorum superficialis (barmaqları bükən səthi əzələ) - 4 vətər

·        Musculus flexor digitorum profundus (barmaqları bükən dərin əzələ) – 4 vətər

·        Musculus flexor pollicis longus (baş barmağı bükən uzun əzələ)

·        Nervus medianus (orta sinir)

Vətərlər şəhadət, orta, üzük və çeçələ barmağın bükülməsini təmin edir. 

Şəkil 1: Karpal tunelin aksial görünüşü.

Funksiya

Retinaculum flexorum və ya ligamentum carpi transversum bükən əzələlərin vətərlərini bilək sümüklərinə yaxın tutur və bununla qüvvənin təsirli istifadəsinə xidmət edir.

Kliniki dəyər

• Karpal tunel sindromu. Kəskin və ya xroniki patoloji proses nəticəsində karpal tuneldə təzyiqin artması orta sinirin sıxılmasına gətirir. Kompression nevropatiyalar arasında ən yayılmışıdır.
• Said və bilək sümüklərinə cərrahi əlçatım. Bu sümüklərə palmar tərəfdən aparan yol karpal tuneldən keçir.